നമ്മുടെ കൈയ്യിലുള്ള സ്മാർട്ട്ഫോണും ഇന്റർനെറ്റും ഒരു നിമിഷം നിശ്ചലമായാൽ എന്ത് സംഭവിക്കും? വെറും ആശയവിനിമയം മാത്രമല്ല, നമ്മുടെ ബാങ്ക് ഇടപാടുകളും ബിസിനസ്സും എന്തിന് വഴി കണ്ടെത്താനുള്ള മാപ്പുകൾ പോലും ഇല്ലാതാകും. അത്തരമൊരു വിചിത്രമായ അവസ്ഥയിലൂടെയാണ് ഇപ്പോൾ റഷ്യ കടന്നുപോകുന്നത്.
ലോകം 5G-യെ കുറിച്ച് സംസാരിക്കുമ്പോൾ, റഷ്യക്കാർ പെട്ടെന്ന് 90-കളിലെ പേജറുകളിലേക്കും വാക്കി-ടോക്കികളിലേക്കും മടങ്ങിപ്പോകുകയാണ്. ഇന്റർനെറ്റ് സെൻസർഷിപ്പും സാങ്കേതിക തടസ്സങ്ങളും ഒരു രാജ്യത്തിന്റെ സാമ്പത്തിക വ്യവസ്ഥയെ എങ്ങനെയൊക്കെ തകിടം മറിക്കാമെന്നതിന്റെ ഞെട്ടിക്കുന്ന ഉദാഹരണമാണ് ഇപ്പോൾ പുറത്തുവരുന്നത്. ഈ മാറ്റം സാധാരണക്കാരന്റെ പോക്കറ്റിനെ എങ്ങനെയൊക്കെ ബാധിക്കുന്നു എന്ന് നമുക്ക് നോക്കാം.
വിപണിയിലെ പെട്ടെന്നുള്ള മാറ്റം
ഇന്റർനെറ്റ് തടസ്സപ്പെട്ടതോടെ പഴയകാല സാങ്കേതിക വിദ്യകൾക്ക് പെട്ടെന്ന് വൻ ഡിമാൻഡ് ഉണ്ടായിരിക്കുന്നു.പേജറുകളുടെ വിൽപ്പനയിൽ 73% വർധനവ് ഉണ്ടായി.വാക്കി-ടോക്കികളുടെ വിൽപ്പനയിൽ 27% വർധനവ് ആണ് ഉണ്ടായിരിക്കുന്നത്.
പേപ്പർ മാപ്പുകളുടെ വിൽപ്പന മൂന്നിരട്ടിയായി വർധിച്ചു. ഇത് സൂചിപ്പിക്കുന്നത്, ഇത്രയും കാലം സ്മാർട്ട്ഫോൺ വിപണി കൈയടക്കിയിരുന്ന പണം ഇപ്പോൾ ഇത്തരം പഴയ ഉപകരണങ്ങൾ നിർമ്മിക്കുന്ന കമ്പനികളിലേക്കും വിതരണക്കാരിലേക്കും ഒഴുകുന്നു എന്നാണ്.
ഡിജിറ്റൽ പേയ്മെന്റുകളുടെ തകർച്ച
ഇന്നത്തെ കാലത്ത് കടയിൽ പോയി സാധനം വാങ്ങിയാൽ നമ്മൾ ഗൂഗിൾ പേയോ കാർഡോ ആണ് ഉപയോഗിക്കുന്നത്. ഇന്റർനെറ്റ് ഇല്ലാതാകുമ്പോൾ ഓൺലൈൻ ബാങ്കിംഗ് സംവിധാനങ്ങൾ തകരാറിലാകുന്നു.ക്രെഡിറ്റ്ഡെ,ഡെബിറ്റ് കാർഡ് പേയ്മെന്റുകൾ പരാജയപ്പെടുന്നു.ഇത് ജനങ്ങളെ വീണ്ടും നോട്ടുകൾ കൈവശം വെക്കാൻ പ്രേരിപ്പിക്കുന്നു. ഇത് രാജ്യത്തെ പണമിടപാടുകളുടെ വേഗത കുറയ്ക്കും.
ഇ-കൊമേഴ്സ് മേഖലയിലെ നഷ്ടം
റഷ്യയിലെ 'വൈൽഡ്ബെറി' പോലുള്ള ഓൺലൈൻ ഷോപ്പിംഗ് പ്ലാറ്റ്ഫോമുകൾക്ക് ഇത് വലിയ തിരിച്ചടിയാണ്. ഇന്റർനെറ്റ് ഇല്ലാതെ ആളുകൾക്ക് സാധനങ്ങൾ ഓർഡർ ചെയ്യാൻ കഴിയില്ല. ഇത് ആയിരക്കണക്കിന് കോടി രൂപയുടെ ബിസിനസ്സ് നഷ്ടത്തിലേക്കും, അതുമായി ബന്ധപ്പെട്ട് ജോലി ചെയ്യുന്ന ഡെലിവറി പങ്കാളികളുടെ വരുമാന നഷ്ടത്തിലേക്കും നയിക്കുന്നു.
ഉൽപ്പാദനക്ഷമത കുറയുന്നു
ഓഫീസുകൾ, ബാങ്കുകൾ, ലോജിസ്റ്റിക്സ് കമ്പനികൾ എന്നിവയെല്ലാം ഇന്റർനെറ്റിനെ ആശ്രയിച്ചാണ് പ്രവർത്തിക്കുന്നത്. ഒരു ഇമെയിൽ അയക്കാനോ ഫയലുകൾ കൈമാറാനോ കഴിയാതെ വരുമ്പോൾ ബിസിനസ്സുകൾ മന്ദഗതിയിലാകുന്നു. സമയം പണമായതിനാൽ, ഈ തടസ്സം രാജ്യത്തിന്റെ ആകെ ആഭ്യന്തര ഉൽപ്പാദനത്തെ ബാധിക്കുന്നു.
കരിഞ്ചന്തയും വിലക്കയറ്റവും
ആവശ്യത്തിന് പേജറുകളോ വാക്കി-ടോക്കികളോ മാർക്കറ്റിൽ ഇല്ലാത്ത സാഹചര്യത്തിൽ, ഉള്ളവയ്ക്ക് അമിതവില ഈടാക്കാൻ വ്യാപാരികൾ മുതിരും. ഇത് സാധാരണക്കാരന്റെ ചിലവ് വർധിപ്പിക്കുന്നു.
റഷ്യക്കാർ പഴയ രീതിയിലേക്ക് മാറുന്നത് വെറും സൗകര്യത്തിന് വേണ്ടിയല്ല, മറിച്ച് തങ്ങളുടെ സാമ്പത്തിക ഇടപാടുകൾ തടസ്സപ്പെടാതിരിക്കാനുള്ള ഒരു പരീക്ഷണമാണ്. ഇത് ആധുനിക ഡിജിറ്റൽ വിപണിയെ വർഷങ്ങൾ പിന്നോട്ട് കൊണ്ടുപോകുന്നതിന് തുല്യമാണ്.
Content Highlights :Russia: Internet Blocking, Disruptions and Increasing Isolation